ਧਰਮ ਅਧਾਰਿਤ ਵੰਡੀਆਂ/Divisions based on religion, again I do not want

partition-of-punjab-poetry

ਧਰਮ ਅਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਧਰਮ ਅਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਹੋਣ ਸੁਹਾਗਣਾਂ ਰੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਰੁਲਣ ਲਾਵਾਰਿਸ ਬੱਚੜੇ, ਤੇ ਬੇਪਤ ਨਾਰੀ

ਤੁਸੀਂ ਪੜ੍ਹਾਵੋ ਚੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਧਰਮ ਆਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਫਿਰ ਰੋੋਲੇ ਟੋਪੀ ਪੱਗ ਨੂੰ, ਪੱਗ ਟੋਪੀ ਰੋਲੇ

ਲਹਿ-ਲਹਿ ਜਾਵਣ ਘੰਡੀਆਂ,ਮੁੜ ਮੈਂ ਨਹੀਂ ਚਾਹੁੰਦਾ

ਧਰਮ ਆਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਕੱਟ-ਵੱਢ ਕਰਕੇ ਕਦੇ ਨਾ ਪਾਕਿਸ-ਖ਼ਾਲਿਸ ਹੁੰਦੇ 

ਗੱਲਾਂ ਹੱਡੀਂ ਹੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ 

ਧਰਮ ਆਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਸੱਤਾ ਦੇ ਵਿੱਚ ਮੁੜ-ਮੁੜ ਲੋਕੀ ਉਹੀਓ ਆਉਣੇ

ਬਦਲਣ ਝੰਡੇ ਝੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਧਰਮ ਆਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਮੈਂ ਨਹੀਂ ਕਹਿੰਦਾ ਜੁਲਮ ਦੇ ਸਾਹਵੇਂ, ਚੁੱਪ ਕਰ ਬੈਠੋ

ਲੋਚਾਂ ਲੁੱਚੀਆਂ-ਲੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ 

ਧਰਮ ਆਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਮਹਾਕਾਵਿ ਕਲਯੁਗਨਾਮਾ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿਕ ਕਰੋ

ਵਾਟਾਂਵਾਲੀਆ ਵੇਖ ਲਈ, ਅਸੀਂ ਵੰਡ-ਵੰਡ ਧਰਤੀ 

ਸਾਂਝਾ ਜਾਣ ਕਰੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

ਧਰਮ ਆਧਾਰਿਤ ਵੰਡੀਆਂ, ਮੁੜ ਮੈਂ ਨਹੀਂ ਚਾਹੁੰਦਾ

30-08-2015

ਜਸਬੀਰ ਵਾਟਾਂਵਾਲੀਆ

ਹੋਰ ਕਵਿਤਾਵਾਂ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿਕ ਕਰੋ

Khalistan - ਖਾਲਿਸਤਾਨ ਬਣਾਉਣ ਨੂੰ ਫਿਰਦੇ...?

ਨਵੀਆਂ ਵੰਡੀਆਂ ਪਾਉਣ ਨੂੰ ਫਿਰਦੇ, ਖਾਲਿਸਤਾਨ ਬਣਾਉਣ ਨੂੰ ਫਿਰਦੇ

ਕੁਝ ਨਸ਼ਿਆਂ ਮਰਵਾਤੇ ਗੱਭਰੂ, ਕੁਝ ਨੂੰ ਇਹ ਮਰਵਾਉਣ ਨੂੰ ਫਿਰਦੇ

.......

ਪੈਰ-ਪੈਰ 'ਤੇ ਹੱਦਾਂ ਬਣੀਆਂ, ਮੀਲਾਂ ਤੱਕ ਸਰਹੱਦਾਂ ਬਣੀਆਂ

ਲਹੂਆਂ ਦੇ ਪਰਨਾਲੇ ਚੱਲ ਗਏ, ਇਹ ਹੁਣ ਹੋਰ ਚਲਾਉਣ ਨੂੰ ਫਿਰਦੇ

ਖਾਲਿਸਤਾਨ ਬਣਾਉਣ ਨੂੰ ਫਿਰਦੇ. ..

ਉੱਪਰੋਂ ਸਾਂਝੀਵਾਲ ਸਦਾਉਂਦੇ, ਜੋਰ-ਜੋਰ ਦੀ ਨਾਹਰੇ ਲਾਉਂਦੇ

ਮਾਨਵਤਾ ਨੂੰ ਮਿੱਧ ਕੇ ਪੈਰੀਂ, ਕਿਹੜਾ ਧਰਮ ਨਿਭਾਉਣ ਨੂੰ ਫਿਰਦੇ

ਖਾਲਿਸਤਾਨ ਬਣਾਉਣ ਨੂੰ ਫਿਰਦੇ....

ਪਾਕਿਸਤਾਨ ਬਣਾਇਆ ਉਹਨਾਂ, ਕੀ ਖੱਟਿਆ !ਕੀ ਪਾਇਆ ਉਹਨਾਂ !

ਬਸ ਚੌਧਰ ਦੇ ਕਲਗੇ ਲੈ ਕੇ, ਆਪਣੇ ਮੱਥੇ ਲਾਉਣ ਨੂੰ ਫਿਰਦੇ

ਖਾਲਿਸਤਾਨ ਬਣਾਉਣ ਨੂੰ ਫਿਰਦੇ...

ਮਹਾਕਾਵਿ ਕਲਯੁਗਨਾਮਾ - ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿੱਕ ਕਰੋ

ਖਾਲਿਸਤਾਨ ਬਣਾਉਣਾ ਸੌਖਾ, ਖਾਲਿਸ ਹੋ ਕੇ ਜਿਉਣਾ ਔਖਾ

‘ਵਾਟਾਂਵਾਲੀਆ’ ਹੁਣ ਨਹੀਂ ਪੜ੍ਹਨਾ, ਇਹ ਜੋ ਪਾਠ ਪੜ੍ਹਾਉਣ ਨੂੰ ਫਿਰਦੇ

ਖਾਲਿਸਤਾਨ ਬਣਾਉਣ ਨੂੰ ਫਿਰਦੇ...

    

22-08-2015

ਜਸਬੀਰ ਵਾਟਾਂਵਾਲੀਆ

Independence Day and the pain of Punjab

Partition is a pain of the Punjab

ਆਜ਼ਾਦੀ ਦਿਵਸ ਅਤੇ ਪੰਜਾਬ ਦਾ ਦਰਦ 

ਕੀ ਇਸ ਅੱਧੇ ਦੀ ਸਿਫਤ ਕਰਾਂ, ਅੱਧਿਓ ਵੀ ਅੱਧਾ ਰਹਿ ਗਿਆ ਏ 

ਸਿਰ ਇੱਕ ਪਾਸੇ, ਧੜ ਇੱਕ ਪਾਸੇ, ਕੋਈ ਲੱਤਾਂ-ਬਾਹਾਂ ਲੈ ਗਿਆ ਏ

ਸੀ ਕੈਸਾ ਜਾਲ਼ ਗ਼ੁਲਾਮੀ ਦਾ, ਕੱਟਣ ਦੀ ਖਾਤਿਰ ਲੜਿਆ ਮੈਂ 

ਸੀਨੇ 'ਤੇ ਤੋਪਾਂ ਝੱਲੀਆਂ ਮੈਂ, ਹੱਸ-ਹੱਸ ਕੇ ਫਾਸੀ ਚੜ੍ਹਿਆ ਮੈਂ 

ਇਹ ਪਾਕਿਸ-ਖਾਲਿਸਤਾਨਾਂ ਦਾ, ਕਿਸ ਆਖੇ ਰੱਫੜ ਪੈ ਗਿਆ ਏ 

ਸਿਰ ਇੱਕ ਪਾਸੇ, ਧੜ ਇੱਕ ਪਾਸੇ, ਕੋਈ ਲੱਤਾਂ ਬਾਹਾਂ ਲੈ ਗਿਆ ਏ...

ਮੈਂ ਜਿਸ ਮਕਸਦ ਲਈ ਲੜਿਆ ਸੀ, ਉਹ ਮਕਸਦ ਅਜੇ ਅਧੂਰਾ ਏ 

ਪੰਜਾਬ ਦੇ ਟੁੱਕੜੇ ਹੋ ਗਏ ਨੇ, ਜ਼ਾਲਮ ਪੁਰੇ ਦਾ ਪੁਰਾ ਏ 

ਅੱਜ ਵੀ ਅਬਦਾਲੀ ਜਿਉਂਦਾ ਏ, ਚੜ੍ਹ ਤਖ਼ਤੇ ਉੱਤੇ ਬਹਿ ਗਿਆ ਏ 

ਸਿਰ ਇੱਕ ਪਾਸੇ, ਧੜ ਇੱਕ ਪਾਸੇ, ਕੋਈ ਲੱਤਾਂ ਬਾਹਾਂ ਲੈ ਗਿਆ ਏ...

ਕਦੇ ਗੋਰਾ ਸੀ, ਅੱਜ ਕਾਲ਼ਾ ਏ, ਕੁਰਸੀ 'ਤੇ ਬਦਲੇ ਬੰਦੇ ਨੇ 

ਜਿਹੜੇ ਕਾਲ਼ੇ ਕੰਮ ਸੀ ਗੋਰੇ ਦੇ, ਕਾਲ਼ੇ ਦੇ ਉਹੀਓ ਧੰਦੇ ਨੇ 

ਇਹ ਗਲਬਾ ਲੀਡਰਸ਼ਾਹੀ ਦਾ, ਗਲ਼ ਫਾਹੀ ਬਣਕੇ ਪੈ ਗਿਆ ਏ 

ਸਿਰ ਇੱਕ ਪਾਸੇ, ਧੜ ਇੱਕ ਪਾਸੇ, ਕੋਈ ਲੱਤਾਂ ਬਾਹਾਂ ਲੈ ਗਿਆ...

ਮਹਾਕਾਵਿ ਕਲਯੁਗਨਾਮਾ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿਕ ਕਰੋ

ਅੱਜ ਮੇਰੇ ਜਿੰਨੇ ਟੁੱਕੜੇ ਨੇ, ਉਹਨਾਂ 'ਚੋਂ ਇਹੀ ਆਵਾਜ਼ਾਂ ਨੇ 

ਉਏ 'ਵਾਟਾਂਵਾਲੀ' ਮਾਰ ਲਿਆ, ਇਹਨਾਂ ਧਰਮਾਂ ਨੇ ਇਹਨਾਂ ਤਾਜਾਂ ਨੇ 

ਇਹ ਮਾਨਵਤਾ ਦਾ ਮਹਿਲ ਖੜ੍ਹਾ, ਵੇਂਹਦੇ-ਵੇਂਹਦੇ ਹੀ ਢਹਿ ਗਿਆ ਏ 

ਸਿਰ ਇੱਕ ਪਾਸੇ, ਧੜ ਇੱਕ ਪਾਸੇ, ਕੋਈ ਲੱਤਾਂ ਬਾਹਾਂ ਲੈ ਗਿਆ ਏ..

15-08-2015

ਜਸਬੀਰ ਵਾਟਾਂਵਾਲੀਆ

Punjab became an effigy - ਪੰਜਾਬ ਪੁਤਲਾ ਰਹਿ ਗਿਆ

Punjab has become a mannequin

Pain of Punjab

ਪੰਜਾਬ ਪੁਤਲਾ ਰਹਿ ਗਿਆ 

ਤਰਕਸ਼ਾਂ 'ਚੋਂ ਬਾਣ ਕੱਢ ਕੇ ਲੈ ਗਏ 

ਡੋਲਿਆਂ 'ਚ ਤਾਣ ਕੱਢ ਕੇ ਲੈ ਗਏ 

ਲੈ ਗਏ ਜਜ਼ਬਾਤ-ਜੁੱਸੇ ਲੁੱਟ ਕੇ.. 

ਮਿਰਜਿਆਂ 'ਚੋਂ ਮਾਣ ਕੱਢ ਕੇ ਲੈ ਗਏ

ਰਹਿ ਗਿਆ ਪੰਜਾਬ ਪੁਤਲਾ ਰਹਿ ਗਿਆ 

ਤਖਤ ਲੁੱਟੇ.. ਖੁਆਬ ਉਤਲਾ ਰਹਿ ਗਿਆ 

ਲੈ ਗਏ ਕੋਈ ਲੁੱਟ ਕੋਹਿਨੂਰ ਨੂੰ 

ਹੀਰਿਆਂ ਦੀ ਖਾਣ ਕੱਢ ਕੇ ਲੈ ਗਏ

ਲੈ ਗਿਆ ਕੋਈ ਲੁੱਟ ਕੇ ਜਵਾਨੀਆਂ 

ਘੋਲ-ਛਿੰਝਾਂ, ਮਸਤੀਆਂ ਮਨਮਾਨੀਆਂ 

ਪ੍ਰਾਣ ਲੈ ਗਏ ਪੌਣ ਵਿੱਚੋਂ ਕੱਢ ਕੇ 

ਪਾਣੀਆਂ 'ਚੋਂ ਪਾਣ ਕੱਢ ਕੇ ਲੈ ਗਏ

ਰਹਿ ਗਿਆ ਇਤਿਹਾਸ ਕੋਰਾ ਰਹਿ ਗਿਆ 

ਆਸ ਨਾ ਧਰਵਾਸ, ਝੋਰਾ ਰਹਿ ਗਿਆ 

ਅੱਖ ਵਿੱਚੋਂ ਖਾਬ ਲੈ ਗਏ ਹੂੰਝ ਕੇ 

ਜਾਨ ਵਿੱਚੋਂ ਜਾਨ ਕੱਢ ਕੇ ਲੈ ਗਏ

ਮਹਾਕਾਵਿ ਕਲਯੁਗਨਾਮਾ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿਕ ਕਰੋ

ਤਰਕਸ਼ਾਂ 'ਚੋਂ ਬਾਣ ਕੱਢ ਕੇ ਲੈ ਗਏ 

ਡੋਲਿਆਂ 'ਚ ਤਾਣ ਕੱਢ ਕੇ ਲੈ ਗਏ 

ਲੈ ਗਏ ਜਜ਼ਬਾਤ-ਜੁੱਸੇ ਲੁੱਟ ਕੇ.. 

ਮਿਰਜਿਆਂ 'ਚੋਂ ਮਾਣ ਕੱਢ ਕੇ ਲੈ ਗਏ

10-08-2015

ਜਸਬੀਰ ਵਾਟਾਂਵਾਲੀਆ

ਬੇਘਰ ਲੋਕ - Homeless People - Jasbir Wattanwalia

No news to the homeless! That they do not have a home!

ਬੇਘਰਿਆਂ ਨੂੰ ਖਬਰ ਨਾ ਕੋਈ

ਬੇਘਰਿਆਂ ਨੂੰ ਖਬਰ ਨਾ ਕੋਈ! ਕਿ ਉਹਨਾਂ ਕੋਲੇ ਘਰ ਹੈ ਨਹੀਂ!

ਨਾ ਉੱਡਣ ਲਈ ਅੰਬਰ ਨੀਲਾ! ਤੇ ਪਰਵਾਜ ਲਈ ਪਰ ਹੈ ਨਹੀਂ!

ਕੌਣ ਹੈ ਜਿਸ ਨੇ ਇਹਨਾ ਦੀ ਇਉਂ, ਚੇਤਨਤਾ ਹੀ ਮਾਰ ਲਈ ! 

ਕੌਣ ਹੈ ਜਿਸਨੇ ਸਿਰ ਤੋਂ ਅੰਬਰ, ਪੈਰੋਂ ਧਰਤ ਡਕਾਰ ਲਈ ! 

ਕੌਣ ਹੈ ਜਿਸ ਨੂੰ ਇਹਨਾ ਕੋਲੋਂ, ਭੋਰਾ-ਮਾਸਾ ਡਰ ਹੈ ਨਹੀਂ !

ਬੇਘਰਿਆਂ ਨੂੰ ਖਬਰ ਨਾ ਕੋਈ! ਕਿ ਉਹਨਾਂ ਕੋਲੇ ਘਰ ਹੈ ਨਹੀਂ!

ਕੌਣ ਹੈ ਜਿਸਨੇ ਇਹਨਾ ਦਾ ਇਉਂ, ਅੱਗਾ-ਪਿੱਛਾ ਮਾਰ ਲਿਆ ! 

ਕੌਣ ਹੈ ਜਿਸਨੇ ਅੱਖੀਓਂ ਸੁਪਨੇ, ਤੇ ਲੁੱਟ ਹੀ ਸੰਸਾਰ ਲਿਆ ! 

ਹਾਏ! ਉਹਨਾਂ ਨੂੰ ਸਬਰ ਪੈ ਜਾਵੇ, ਜਿਹਨਾਂ ਨੂੰ ਰਤੀ ਸਬਰ ਹੈ ਨਹੀਂ ! 

ਬੇਘਰਿਆਂ ਨੂੰ ਖਬਰ ਨਾ ਕੋਈ! ਕਿ ਉਹਨਾਂ ਕੋਲੇ ਘਰ ਹੈ ਨਹੀਂ!

ਕੌਣ ਲਿਖੇ ਇਹਨਾਂ ਦੀ ਗਾਥਾ ? ਕੌਣ ਜੋ ਉਸ ਨੂੰ ਬੋਲ ਦੇਵੇ !

ਚੇਤਨਤਾ ਦੀ ਦੇਵੇ ਘੁੱਟੀ, ਵਿੱਚ ਕੁੱਝ ਸੁਫਨੇ ਘੋਲ ਦੇਵੇ ! 

"ਵਾਟਾਂ ਵਾਲੀ" ਇਹਨਾਂ ਦੇ ਲਈ, ਚੇਤਨ ਇੱਕ ਵੀ ਦਰ ਹੈ ਨਹੀਂ

ਕਲਯੁਗਨਾਮਾ ਮਹਾਕਾਵਿ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿਕ ਕਰੋ

ਬੇਘਰਿਆ ਨੂੰ ਖਬਰ ਨਾ ਕੋਈ, ਕਿ ਉਹਨਾਂ ਕੋਲੇ ਘਰ ਹੈ ਨਹੀਂ !

ਨਾ ਉੱਡਣ ਲਈ ਅੰਬਰ ਨੀਲਾ, ਤੇ ਪਰਵਾਜ ਲਈ ਪਰ ਹੈ ਨਹੀਂ!

08-08-2015 

ਜਸਬੀਰ ਵਾਟਾਂਵਾਲੀਆ

Rain, The Classic Poetry By Jasbir Wattanwalia/ਬਰਸਾਤ

It's raining outside, but I'm burning inside

ਬਾਹਰ ਹੋਵੇ ਬਰਸਾਤ, ਮੈਂ ਅੰਦਰ ਬਲ਼ ਬਲ਼ ਜਾਵਾਂ

ਬਾਹਰ ਹੋਵੇ ਬਰਸਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ 

ਦੇ ਕੇ ਤੁਰ ਗਇਓਂ ਝਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ

ਬੀਤ ਗਏ ਦਿਨ ਸਾਲ-ਮਹੀਨੇ, ਦਰਦ-ਫਿਰਾਕ ਨੂੰ ਲਾਇਆ ਸੀਨੇ 

ਨਾ ਦਿਨ ਚੈਨ ਨਾ ਰਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ 

ਦੇ ਕੇ ਤੁਰ ਗਇਓ ਝਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ....

'ਵੈੜਾ ਰੋਗ ਹੱਡਾਂ ਨੂੰ ਲਾਇਆ, ਹੱਡੀਆਂ ਦੀ ਮੁੱਠ ਬਣਗੀ' ਕਾਇਆ 

ਬਣਿਆ ਇਸ਼ਕ ਅੱਫਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ.... 

ਦੇ ਕੇ ਤੁਰ ਗਇਓ ਝਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ.....

ਦਰ-ਦਰਵਾਜ਼ੇ ਬੈਠ ਉਡੀਕਾਂ, ਲੰਮੀਆਂ ਹੁੰਦੀਆਂ ਜਾਣ ਤਰੀਕਾਂ

ਕੈਸੇ ਹੋਏ ਹਲਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ.... 

ਦੇ ਕੇ ਤੁਰ ਗਇਓ ਝਾਤ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ ...

ਮਹਾਕਾਵਿ ਕਲਯੁਗਨਾਮਾ - ਪੜ੍ਹਨ ਲਈ ਇਸ  ਲਿੰਕ ’ਤੇ ਕਲਿਕ ਕਰੋ

ਤੂੰ ਰੁਸਿਓਂ ਹੁਣੇ ਕਿਵੇਂ ਮਨਾਵਾਂ "ਵਾਟਾਂਵਾਲੀ" ਬਹਿ ਪਛਤਾਵਾਂ

ਮੈਂ ਤੱਤੜੀ-ਕਮਜਾਤਾਂ, ਮੈਂ ਅੰਦਰੋਂ ਬਲ਼-ਬਲ਼ ਜਾਵਾਂ ..

06-08-2015

ਜਸਬੀਰ ਵਾਟਾਂਵਾਲੀਆ

ਹੋਰ ਕਵਿਤਾਵਾਂ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿਕ ਕਰੋ